رفعت مصر صوتها ياناس ياهوووه..
أرضي بتضيع يا عالم .. ووريدي سمموه
ولادي بيقتلوا ولادي .. بموت من الألم
كانوا بيهتفوا باسمي .. ورافعين العلم
منهم من ضرب وشتم .. ومنهم اللي اتظلم
نعم مبارك .. لا مبارك .. الكل موتوه
اللي قال عشانك هموت .. واللي بيهجم عل البيوت
واللي بيسرق واللي بيحرق واللي بيختار السكوت
كله بياخد علقة موت .. وماتقدرش تقول ياهووه
هو حد سامع حاجة .. اصل الحكاية مش محتاجة
انت عميل .. ودول اسرائيل .. والكل بيهتف بلجاجة
حاكم وإعدم .. إرحل إهدم.. مش عايزين للحل بديل
إما اقدم كفني بإيدي .. إما أقول إني عميل
سارق ..خاين ..جاحد هاين.. قاتل الشعب وبايع الأرض..
وسايب الباقي عشان ياخدوه
لكنه عمل اللي طلبتوه..
وقال حاضر زي ماسمعتوه
إدوه فرصه لآخر العقد .. من حقه ينهي مسيرته بمجد
وعد الحُر دين عليه .. وان ماوافاش ابقوا حاكموه
يا ولادي ارحموا شبابي .. عشان اقدر افضل احابي
فكروا بنور المحبة .. خلّوا الحب بينكوا يشابي
الفاسد غيروه .. والغلطان فهموه .. والمعاند كلموه
لكن اوعوا تنسوا انكوا ولادي أنا..
شوفوا عمر نيلي بقاله كام سنة
شوفوا الأيام الصعبة وأيام الهنا..
عمري ف إيديكوا أمانة .. اوعوا تضيعوه !!
الخميس أغسطس 04, 2011 11:34 am
