شبكة الكابتن ميمو الإلكترونية تقدم
السلسلة الساخرة اسكت يا لساني (11) - نبوءة دم (مقتل أحمد الشحات)
من روائع مقولات:
الــســلطــان أحــمــد عــبــدالــكــريــمـــــــــــــــــــــــــــــــــــــــــــــــــ
أحيانا بل قليلا جدا ما تأتينا فرصة للتحدث إلى أحد مثقفى الأجيال السابقة ، ممن يرون العصر والثورة والأحزاب والسياسية والبلد ..... إلخ ، بنفس النظرة الصارخة الجريئة التي نرى بها .
وأنا اعتبر نفسي أحد هؤلاء المحظوظين .
على أحد مقاهي أسيوط العتيقة قابلت أحدهم ، واحد من هؤلاء المثقفين الذين لايعلم عنهم الا القليلين ...
تجاذبنا أطراف الحديث حتى توصلنا الى أحمد الشحات ...
(وهنا اسمحولى أن اعود الى عاميتى المصرية..)
احمد الشحات البطل – اللى في زيه كتييير في مصر - ، فوجئت ان عمي العجوز – اسمحولى اناديه باللقب ده – بيقولي :
أحمد الشحات هيموت قريب ، وكمان هيتقال انه قتل نفسه – واضفت او قضاء وقدر - ، وكمان الموساد اللى هيقتله – واضفت بالتعاون مع مجلسنا العسكري الموقر – وهتعرفوا ليه أنا قولت كده ..
فطبعا ادعيت انى استغربت علشان أعرف كل وجهة نظره وهو عاوز يقول ايه ..
وكمل : ....
آه الشحات هيموت مقتول ومن الموساد كمان ..
اقولك يابنى زمان يمكن من 10، 15 سنة كان في عسكري في الجيش على الحدود اسمه سليمان خاطر ، قتل سبعة جنود اسرائليين على الحدود ....
وسألت سؤال عبيط : طيب قتلهم ليه ؟!
وكمل (باستنكار) :
استفزوا منظرهم على الحدود الفلسطينية ، مستحملش شد الاجزاء وضربهم ..
وطبعا دخل السجن الحربي ، وفي السجن الحربي بعد مدة عرفنا انه شنق نفسه !!!..
تخيل أن الموساد دخل السجن الحربي ، وقتله جوه سجننا ، السجن المصري !!!..
وطبعا عشان مبارك مش عاوز يحمل نفسة تبعيات ، او حاجة قالوا قتل نفسة !!!
تخيل واحد بالروح العالية دي يقتل نفسه !!!!!
وكمل كلامة تاني :
وده طبعا اللي هيحصل مع الولد أحمد الشحات ده ، وافتكر انى قولت كدة ..
هيتقتل ، والموساد هوا اللى هيقتله ...
واتكلمنا في كلام كتييير تانى في موضوعا مختلفة ....
ـــــــــــــــــــــــــــــــــــــــــــــــــــــــــ
انا ممكن اكون متفق معاه في السياسة العامة لكلامة ..
بس سألت نفسي سؤال هوا ممكن نبوءة عمي العجوز تتحقق ؟
لقيتني بميل لتصديق كلامة !!
بس ساعتها ...
برده ممكن نسكت !!!
برده هنلاقى ناس بتقول نفسي نفسي !!!
بتقول اكل العيش !!!
هنلاقى ناس بتقول أن المجلس العسكري مش عاوز يحكم !!!
بتقول الخروج على الحاكم ( المجلس العسكري يعني ) حرام !!!
وبعدين قوليلي فين بتوع كاميليا !!!
( ولا اقولكوا دول مش مكانهم دلوقتى ، لان أيامهم معايا طوييييييييييييييييلة وليهم اسكتات كتييييرة لوحدهم )
والله والله والله يا جدعان احنا في لعبة كبيييييرة !!!
فعلا زي ما قال عمي العجوز المجلس العسكري عجبته اللعبة ...
وعلا فكرة برده هوا قالى أنه سمع واحد من بتوع المجلس العسكري لما بيسألوه ،...
- انتوا نزلوا – على الجيش يعني – نزلتوا جمعة التنحي ومسكتوا البلد على طول في ساعات ...
فجاوب وقال أنهم كان عندهم خطة مسبقة لو بعد مبارك ما خلص مدته وهيورث جمال ، هننزل !!!
وده كان على واحدة من القنوات الفضائية ، والعهدة على الراوي ..
.... برده لسة أنا عايش في نظرية المؤامرة الكبرى ، وعمى العجوز عايش في نفس الغيبوبة !!!
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
أفضل أن اعيش عليها ، على أن أعيش على الاحلام
( دا انا !! )
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
وفي الاخر قبل ما اقول اسكت يا لساني ، هطلب منكم حاجة صغيرة ، ممكن دقيقة حداد .. نقرا الفاتحة للشهيد
(سليمان خاطر)...ولشهيد المستقبل (أحمد الشحات)...ممكن؟؟